RESOLUTION RAP

Ang pagbabago, wala yan sa numero. Kung may gusto kang gawing mabuti, simulan at tapusin mo. RMP

Bagong taon, may bagong tula
Bagong gawa sana wag puro ngawa
Pagbabago wag lang puro salita
Seryosohin wag lang puro pagtatangka
Diet ba kamo sa simula ng taon?
Eh bakit panay ang banat sa natirang lechon
Masama pa ang tingin sa salad at hamon
Wag nang magpanggap meron pang morcon
Di na raw mag-iinom, di na maglalasing
Eh Red Horse na agad kahit bagong gising
Jan 1 pa lang simula na ng mga happenings
Isang taong walang hulas kasama ang beer at gin

Laging may balak pero hindi masimulan
Reso sa New Year ay palaging wish na lang
Pagpapalit ng taon ay numero lang naman
Tunay na pagbabago pwedeng gawin kahit kailan

Lagi na raw sisimba uunahin ang pagsamba
Eh umaga pa lang mura na nang mura
May nakatitigan lang hanap ay away na
Kapapangako lang  bayad na ng pampiyansa
Iwas sa disgrasya, iwas daw sa aksidente
Nabawasan ng tatlo daliring dating bente
Hawakan ba naman super lolong matinde
Akala siguro may super powers siya kase
Iwas chismis, wala na daw intriga
Unang post pa lang meron nang puntirya
Group messages pawang nakahanda na
Yari na naman kung sinuman ang target niya

Laging may balak pero hindi masimulan
Reso sa New Year ay palaging wish na lang
Pagpapalit ng taon ay numero lang naman
Tunay na pagbabago pwedeng gawin kahit kailan

Gustong maging fit pero wish ko lang ang programa
May selfie nga sa gym pero gusto lang pumorma
After mag post ng mga pics sa popular na social media
Ang mga fitness routines pang show lang naman pala
Hindi na raw mang chichicks, good boy na raw from now on
Stick to one na lang at loyal hindi na lilingon-lingon
Wag lang sana mapapasabit sa dako pa roon
Di naman daw siya pumapatol basta hindi hinahamon
Hindi na mangungupit, hindi na mangongopya
Mag-aaral ng mabuti hindi na maglalamiyerda
Uuwi na sa tamang oras at babangon ng maaga
Balik naman sa dating gawi kapag nahila ng barkada

Laging may balak pero hindi masimulan
Reso sa New Year ay palaging wish na lang
Pagpapalit ng taon ay numero lang naman
Tunay na pagbabago pwedeng gawin kahit kailan

Kikilos nang matuwid maglilingkod sa sambayanan
Hindi raw pakikialaman ang mga kaban ng bayan
Ngunit dahil may kabit at may bisyo pang nalalaman
Ang pagnanakaw at kurapsiyon ay paulit-ulit lang
Di na ipagpapabukas ang magagawa ngayon
Ang mga deadlines hindi na maiipon
Management styles hindi na nakakahon
Pero kapag na bad trip limot agad sa maghapon
Maraming gustong gawin pero kulang ang oras
Gustong magbagong buhay pero hindi kayang umiwas
Madali nating sabihin ngunit mahirap umalpas
Kahit ako man may panahon ding umaatras

Laging may balak pero hindi masimulan
Reso sa New Year ay palaging wish na lang
Pagpapalit ng taon ay numero lang naman
Tunay na pagbabago pwedeng gawin kahit kailan

RMP
01/01/2018
Winnipeg MB Canada