YAN ANG PINOY (Isang positibong tula para sa ating lahat mga kabayan)

Nakangiti kahit na may problema
Kahit mahirap nanatiling masaya
Yan ang pinoy mahusay magdala
Laging buhay ang taglay na pag-asa
Mga sakunang dala ng kalikasan
Perhuwisyo ng mga pahirap sa bayan
Hindi matitinag ang nararamdaman
Tuloy ang buhay kahit nasaan pa man
Hindi sumusuko kahit na nagigipit
Kahit ang buhay handang ipagpalit
Matagalan  man bago magkalapit
Basta sa pamilya titiisin ang sakit

Yan ang Pinoy kahit anong mangyari
Lakas ng loob hindi maisantabi
Yan ang Pinoy kahit nasaan pa man
Sa hamon ng buhay handang lumaban

Trapik, init, hindi na iniinda
Siksikan man sa byahe ganun talaga
Kahit araw-araw ay parang penitensiya
Mahalaga’y may maiuwi sa kanyang pamilya
Mamamasukan, mangangamuhan kahit na saan
Maghahanap ng anumang pagkakakitaan
Katamaran sa kanya ay walang puwang
Kahit bilad sa araw basta parehas lang
Subsob sa trabaho kahit mababa ang sweldo
Kahit agrabyado minsan di na nagrereklamo
Sa tiyaga hinuhulma kanyang pagkatao
Kahit pagod na kalalakad kaya pa ring tumakbo

Yan ang Pinoy kahit anong mangyari
Lakas ng loob hindi maisantabi
Yan ang Pinoy kahit nasaan pa man
Sa hamon ng buhay handang lumaban

Matiisin at mahaba ang pasensiya
Kahit sobra-sobra bagaheng dinadala
Problema sa bayan, trabaho at pamilya
Magsabay- sabay man may paglalagyan pa
Mapagmatyag at handang makialam
Kahit tahimik man ay nakikiramdam
Hindi pumapayag sa mga panlalamang
Papalag at papalag basta nasa tama lang
Malakas ang loob at handang pumalaot
Hindi papaalipin sa karuwagan at takot
Kahit saang larangan kahit saan mag-abot
May tapang at talino na laging mabubunot

Yan ang Pinoy kahit anong mangyari
Lakas ng loob hindi maisantabi
Yan ang Pinoy kahit nasaan pa man
Sa hamon ng buhay handang lumaban

Minamaliit kahit ng kapwa niya kalahi
Ginigipit ng mga naghaharing-uri
Dignidad gustong bilhin ng salapi
Subalit may prinsipyong hindi magagapi
Maka Diyos matibay ang pananampalataya
Nanalig kahit magkakaiba ang paniniwala
Ito ang dahilan kaya hindi niya alintana
Anuman ang dumating matibay ang kanyang panata
Mukhang watak-watak ngunit iisa ang hangarin
Umunlad na ang bayang nagluwal sa atin
Nagdarasal, nagsusumamo na sana’y dumating
Ang kapayapaang matagal nang hinihiling

Yan ang Pinoy kahit anong mangyari
Lakas ng loob hindi maisantabi
Yan ang Pinoy kahit nasaan pa man
Sa hamon ng buhay handang lumaban

RMP
3/12/17
Winnipeg MB Canada