TUPADA

sa pula, sa puti
mananaya ay hati
simula na ng pustahan
kapag ikinabit na ang tari
sa meron, sa wala
may dehado at liyamado
kapag nagpukpukan na
mayroong isang mananalo

wag nang magpanggap
na kayo ay mga makabayan
para lang kayong sabungero
na ang buhay ay pustahan
may paboritong manok
dehado man o liyamado
mahal nga ba ang bayan
o nasaktan lang ang ego?

maraming pang sinasabi
halata naman ang pagtaya
walang mali ang kulay
dahil kakampi ang may gawa
sabong lang yan pare
huwag nang ibandila
kung olats ang manok
huwag sisihin ang tumaya

mananaya rin kayo
sa pagpili ay sumusugal
wag magalit sa bumoto
kung ayaw nyo sa nahalal
huwag silang husgahan
kung nag-aasta kayong banal
matalino man kayo
pwede ring maging hangal

kung hanggang taya taya
huwag nang magmatapang
baka hanggang timeline lang
ang limitadong kakayahan
kung gustong lumaban
ang sarili ay tarian
nang maranasan nyo
paano makipagkiskisan

RMP
3/08/18
Winnipeg MB Canada