NAAALALA MO PA BA?

naaalala mo pa ba
mga unang halik at yakap
nang una tayong maglakbay
patungo sa mga ulap
nang tayo’y magtampisaw
sa mapanuksong dagat
nang tayo’y magkaisang
ibigay na ang lahat.

naaalala mo pa ba
mga yakap ng pananabik
ang nag-aalab na damdamin
sa bawat haplos at halik
ang pabilis na pabilis
na tibok ng ating mga dibdib
hanggang sa sumabog
ang pinipigil na pag-ibig.

naaalala mo pa ba
magkasamang pamamahinga
magkahawak ang mga kamay
habang nagpapantasya
naaalala mo pa ba
bawat araw ng pagkikita
at ang bawat gabi
na di tayo magkasama.

sana ay sariwa pa
ang lahat ng mga ito
sana ay buhay pa
sa puso’t isipan mo
sana’y ako pa rin
ang pinanabikan mo
sapagkat kung hindi
pareho na lang tayo.

RMP
3-25-99