ANAKPAWIS

bilad sa initan babad sa ulanan
mabigat na kargada sa balikat ay tangan
pabalik-balik hanggang maisalansan
ang mga kargadang pinagkakakitaan
halo ng semento buhangin at graba
kailangang matapos ginagawang kalsada
hakot ng hollowblocks sampa sa scaffolding
trabaho’y di natatapos kahit na dumilim

kilos anakpawis, kilos manggagawa
huwag ikahiya pagiging maralita
kilos anakpawis, kilos manggagawa
sa inyo nakasalalay kaunlaran ng bansa

tanim ng punla ani ng bunga
sa lupang kaytagal na niyang sinasaka
kahit baon sa utang at pagod ang katawan
patuloy ang pagsasaka nang may makain ang bayan
pumapalaot kahit malakas ang unos
di alintana ang lakas ng agos
kailangang may malambat nang may maipagbili
kahit binabarat presyo ng nahuli

kilos anakpawis, kilos manggagawa
huwag ikahiya pagiging maralita
kilos anakpawis, kilos manggagawa
sa inyo nakasalalay kaunlaran ng bansa

kontraktwal sa industriya bukas sa pananamantala
karapatan inaapakan ng mga kapitalista
kahit na gipit pilit na kumakapit
subsob sa trabaho kahit ang bayad ay di sulit
iba’t ibang sitwasyon, iba’t iba ang kwento
subalit ang biktima ay magkakapareho
magsasaka, mangingisda at ang uring manggagawa
anakpawis na biktima nagdarahop, maralita

kilos anakpawis, kilos manggagawa
huwag ikahiya pagiging maralita
kilos anakpawis, kilos manggagawa
sa inyo nakasalalay kaunlaran ng bansa

RMP
7/5/2013