Dating malinaw ngayon ay lumabo
Nabura, napalitan ngayon ay halu-halo
Dating tuwid ngayon ay liku-liko
Dating hayag, nawala’t nagtatago
Iginuhit sa isip burado sa dibdib
Kumupas ang kulay nawala ang bagsik
Bandilang bitbit isa na lamang pantakip
Larawang sandigan luma na at punit-punit
Nagsitawiran, gumitna at kumanan
Mga dalang bagahe ay naglalaglagan
Hindi na malaman kasama o kalaban
Kulay naging itim o naging dilawan
Kanya-kanya ng bitaw iba na ang galaw
Hinog na nabulok o bumalik sa pagkahilaw
Ang linya ng pag-asa hindi na basta matatanaw
Tinakpan ng mga sumama sa ganid at magnanakaw
Hindi nagmamalinis linya ko man ay lumilihis
Kahit ang pananaw madalas nang nagmimintis
Maluwag na ang lubid na nagsilbing bigkis
Makapal na prinsipyo panipis na nang panipis
RMP
3/17/2017
Winnipeg MB Canada
